حكى الإعلامي والمنتج عماد الدين أديب كواليس فيلم “حسن ومرقص” وكيف تمكن من جمع الفنان عادل إمام والفنان عمر الشريف في فيلم واحد وسبب رفض محمود عبد العزيز المشاركة في العمل.
وقال عماد الدين أديب خلال لقائه في بودكاست “موعد مع لميس”: “في فيلم “حسن ومرقص” الأول كان هيكون شريك الأستاذ عادل إمام هو الأستاذ محمود عبد العزيز لكن اختلفوا، وبعد ما كنت نجحت إني في مهرجان كان أقعدهم مع بعض وأصالحهم لأن كان موضوع “رأفت الهجان” رجع اتفتح تاني ودا كان سبب، عادل إمام قالي أنا مش ممكن اشتغل معاه ومحمود عبد العزيز قال أنا مش عايز اشتغل معاه”.
وتابع عماد الدين أديب: “رجعت لأستاذ عادل إمام وسألته هنعمل الفيلم مين هيبقى الطرف التاني اقترح أسماء كلها أقل كتير من الأستاذ محمود عبد العزيز، قلتله مينفعش أنت سواء مثلت دور المسيحي أو المسلم لازم يكونوا الطرفين متعادلين قالي أنا مفيش حد موازي ليا أو في قيمتي غير عمر الشريف، بعد ساعة كان عمر الشريف داخل المكتب قدامه”.
وأوضح عماد الدين أديب أن عمر الشريف قبل بالدور على الفور قائلا: “كلمت عمر الشريف ووافق على التليفون وجيه المكتب وسلم عليه وقلت لأستاذ عادل إمام دا شريكك في الفيلم، وكان من أعظم الناس عمر الشريف بيجي في ميعاده ومذاكر ولابس الشخصية وعارف حوار الطرف اللي قدامه مش بس حواره هو”.
وفيلم “حسن ومرقص” بطولة عادل إمام وعمر الشريف ولبلبة وهناء الشوربجي ومحمد عادل إمام وشيري عادل وعزت أبو عوف ويوسف داود وإدوارد وحسن مصطفى ومحمد شرف وغيرهم من النجوم، تأليف يوسف معاطي وإخراج رامي إمام.
